1Th 5 | MCQ | STEP | 'Enakaivo vwehu núne iviamaikino ichá'ina ho vea irakijino ikara rehunijaho na jona pavene 'warahuna.

1 Thessalonians 5

Natohwijara Rohuni Veiji Amairiara Hunijina

1 'Enakaivo vwehu núne iviamaikino ichá'ina ho vea irakijino ikara rehunijaho na jona pavene 'warahuna. 2 Ja ijaho ni maho'o hejume pa'arena ja'ina'e Natohwi jihuni veijara ro'amajaho areri nesa apeji'inijara na'i rouja'ina'e rohuna. 3 'Ene pu vea ka'ene unekajaho pare'ena 'wavi'i matauma hi'avajino ni'aha kwino sisea puni haha 'ahi rehuna. Areri napari hariha nahe'i 'ahau'e veji'i haha ka'ene henuja'ina'e hehuna kaivo pu juhaha usehunijaho areri parehuna. 4 'Enakaivo vwehu núne ja nututa pahiju jihuna'e ijí vea kajaho ja nesa apeji'ina puna'i paroe asitahuna. 5 Ijihuni maijaho ja hanaji'ini jihuni harihija 'ee ve'iri'ijihuni harihija. Nú na'iaho nututi jihuni harihija pana. 6 'Enakúne roe ja pu'úmo ea 'ahopo vejuja'ina'e panotui kaivo 'urine nia nirie 'aiha veji'i hija. 7 Ijihuni maijaho ea ka'ene notujaho pu puni nia na'i notuura 'ee ea ka'ene toa sisea ine nanamiujaho pu na'i toa sisea ine nanamiura. 8 'Enakaivo nú ea ka'ene veirihuni jihuna'e roe masuani núni túratakaho nimairoa 'ee oja 'ekaravujino same 'ee isúa nimairoa ka'ene ni'ajúhajino sava. 9 Ijihuni maijaho Godiho nú Huni sena vaji aruhuna iji pijúhuna pana kaivo ni'ajúhajaho núni Natohwa Jesu Keriso oni vaji apehuna'e ija pijúhana. 10 Hu núnijihuna'e kwama jihuna'e nú mai'o hi'eja ho kwamasahuna kaivo nú pu pu'úmo ahuma majama hihuna. 11 Ijihuni hahi ojono 'wame ni'ajarame 'ee ojono nasarame 'urine emare'avara. 'Ene ja niveju kaja'ina'e ve'avara.

Túchamahuni Kara Ichá'iniji Ohunijine 'Ee 'Ajoramajina

12 'Enakaivo vwehu núne nú ja jarirame 'waravujaho ea ka'ene joni vaja kajino kaukara kikisina'e vene 'ee Natohwi jihuni vaji ja 'ajoha'e 'ee vu'a ka'ene pu 'waravujaho ta'arora'avara. 13 'Ene oja 'ekauri vajijino pura kaukara ka'ene vejujihuna'e puni hura vene ira mamaa ijino 'wara'avara. 'Ene ea 'aho pu'úmo matauma hi'avara. 14 'Ene vwehu núne nú ja jarirame 'waravujaho ja ea ka'ene vu'ataa paheji'inijija 'urara'avara. 'Ene ea ka'ene tea junavi'inijija 'ee ea ajuasina ni'aji'avara. 'Ee ohura paape'avara ka'i ea 'aho pu'úmo masuani hi'avara. 15 Ja paki'eje ea 'ahopo ja sise'i 'ahiakame ja eha vene pununa'i sisea ve'ava. 'Enakaivo na'ia mapoka 'unama ka'ene vejakame ea kwinu kwino maranie 'ee ea maho'o 'u'o maranihunijiru sarame ve'avara. 16 'Ene na'ia mapoka'e temarasa'avara. 17 'Ene na'ia mapoka'e siporua maijí 'oji'i na'avara. 18 Uneunecha mapoka ka'ene rejujija Godi teimani 'wa'avara. Ijihuni maijaho ijaho Godoni ura ka'ene jara Jesu Keriso oni vaji vehuna'e ura renujina. 19 Ja Godoni 'Aveni jihuni vena paveje uta'amana. 20 Vu'a ka'ene túna'i rehuniji 'warave he'avajaho pasena'avara. 21 'Enakaivo uneunecha mapokakija 'eke hami piuhihu va'o mamaijija ija kisina'e 'eke 'uninami'avara. 22 'Unama ka'ene sisea rehuna sa'ina'e ki'avajaho juha'avara. 23 'Ene ivi'a Godia ka'ene matauvi'inijara maho'o venae arimaa'e rene 'ee joni 'avena 'ee joni oja 'ee joni haha maho'o 'ajohakame vea ka'ene núni Natohwa Jesu Kerisora ro'amajaho niho'o panamu'amana. 24 Hu niho'o pauchavi'inijara a 'umenana'omo Hu aneja venajaho ve parahuna. 25 'Ene vwehu núne núni siporua 'onu'avara. 26 'Ene vwehu núna 'ajorame ura mina vena'avara. 27 Na Natohwi jihuni ihi 'urahi'i 'waravukúne ike asurakaho tahe vwehu núna maho'o he'avara. 28 Núni Natohwa Jesu Keriso oni maiji vwihanúujaho ja pu'úmuna.